Euria lagun, eguraldi narrasa izan zuten goiz partean, eta Aozaratzako elizpera jo behar izan zuten artelanok egitera: "Urtegian egin izan bagenitu ikusgarriagoak izango ziratekeen, baina ezin", adierazi zuten antolatzaileek.
Ikastetxean landuta zekarten gaia ikasleek, hau da, gaia hautatuta eta zelan landu erabakita. Hiru lan egin zituzten taldetan banatuta: Urkulu urtegia eta kutsaduraren eragina –urtegia eta inguruak irudikatu zituzten, baita erratza eta pala handiak ere kutsadura jasotzeko–; urtegia egitean ur azpian geratutako baserriak; eta ura –ur tantak irudikatuta–. Naturak emandako osagaiak erabilita egin zituzten lan guztiak: abarrak, sokak, letxuga eta aza hostoak, buztina…
Auzolana sustatu eta artelanak bultzatu
Eguerdi partean, eguzki izpiak agertzen hasi zirenean, Aozaratzatik Goroeta auzora eroan zituzten artelanok, hegaztiak behatzeko dorrea dagoen gunera, hain zuzen. Lurrean jarri zituzten eta bertan egongo dira ikusteko hainbat egunetan.
Eguraldiak lagundu ez arren antolatzaileak pozik agertu ziren: "Helburuak dira auzolana sustatzea eta naturartea bultzatzea, hau da, artea elementu naturalak erabilita. Horrez gain, Urkulu inguruak duen balioa landu dugu, kutsaduraren eragina tartean".