Naturgintza fundazioko kideen laguntza eta aholkularitza izango dute bertaratzen direnek, eta Foru Aldundiak duen mintegitik ekarritako zuhaitzak landatuko dituzte. Iaz urtegi ertzean egin zuten landaketa eta aurten Markietegi baserri alboko lur eremuan izango da.
Guztira, 86 bat izango dira landatuko dituzten zuhaitzak, bertako espezieak guztiak, eta Naturgintzakoek egunean bertan gehiago ekar lezakete. Hona: haritzak, 18 (Quercur Robur); arteak, 15 (Quercus Ilex); ametzak, 18 (Quercus Pyrenaica); urkiak, 15 (Betula Alba); hostazuriak, 10 (Sorbus Aria); eta gereziondoak, beste 10 (Prunus Avium).
Horiek guztiak landatzeko, aitzurra eta pala hartu eta lanerako gertu dauden herritarrak beharko dituzte domekan. Eta egindako lana eskertzeko hamaiketakoa eskainiko die gero Udalak bertaratutakoei.