Iesbaako arduradun Olaia Sagredorekin batera Jordi Ferrer filmaren zuzendarietako bat eta Juan Soroeta EHUko irakaslea izan ziren ekitaldian. Saharako gazte bat ere bertaratu zen eta filmaren ondoren ikusleen artean sortutako eztabaidari bizi-bizirik eutsi zion. Sagredo pozik agertu da sahararren eskubideen gainean hausnartzeko tartea hartu dutelako herritarrek: "Filmak sahararren benetako errealitatearen eta gatazkaren berri ematen du, eta horren gainean jardun zuten elkartutakoek. Iritzi ezberdinak ere agertu ziren, gerrara joan edo ez, esaterako". Arabia eta Afrikako hainbat herrialdeetan gertatzen dabilenaren inguruan ere egin zuten berba, eta nazioarteko legeek zer dioten argitu zuen Soroeta irakasleak.
Iesbaa elkarteak eskerrak eman gura dizkio Euskal Fondoari El Problema filma Euskal Herrian zabaldu duelako, Saharako errealitatearen berri emanaz euskal herritarren artean.