Aldaketaren arrazoia da "erabiltzaileari erosotasuna eta samurtasuna ematea". Hala zehaztu du Asier Muxika kirol teknikariak: "Administrazio lana asko gehituko zaigu, baina hileko kuotaren aldeko joera dago leku askotan eta horren alde egin dugu. Erabiltzailearendako erosoagoa da hilero tasa txiki bat ordaintzea, bapatean kantitate handi bat baino; eta abantaila da, gura beste hilabetetarako alta eman dezakeelako". Kiroldegi berria zabaltzerakoan ere hortik joko dutela zehaztu du Muxikak.
Matrikula ordaindu alta ematerakoan
Hilabetean ordaindu beharreko kuotarekin batera matrikula ezarri dute. "Alta ematerakoan ordaindu beharko dute matrikula. Alta eta bajetan gorabehera handiak ez izateko jarri dugu kopuru hori. Hala ere, 2010eko abenduan abonatuak zirenei ez diegu kopuru hori kobratu", argitu du kirol teknikariak. Gainera, aldaketak egin dituzte kobratzeko sasoian ere; lehen, hilabete bukaeran pasatzen bazuten ere banketxetik, orain hilabete hasieran kobratuko dituzte bai kirol tasa, bai kirol jarduerak, administrazio lanak errazteko.
Familia abonua eta norbanakoaren abonuarekin batera abonu murriztuak lehen bezala jarraituko du, hau da, %50eko murrizketa izango dute horiek. Hiru taldek izango dute abonu murriztua: langabeak –Inemeko ziurtagiriarekin–; ikasleak; eta gutxitu fisiko eta psikikoak. Bestalde, familia ugariek Gizarte Zerbitzuen bitartez lortu behar dute murrizketa. Asmoa da urte bukaeran itzultzea urtean zehar ordaindutakoaren erdia.
Muxikaren esanetan kirol abonuarekin ahalik eta zerbitzu gehien eskaintzea da asmoa. Hori horrela, orain arte saunan sartzea aparte kobratzen bazuten ere orain debalde izango da. Eskaintzen dituzten kirol jarduerak, ostera, KPI igo dira.
Aretxabaletako kirol abonuak
Familia abonua (18 urte arteko seme-alabekin):
- Ohikoa, 9,50 euro hilean
- Erroldatu gabeak, 10,45 euro hilean
- Matrikula, 12 euro
Norbanakoaren abonua (16 urtetik gorakoak):
- Ohikoa, 7,50 euro hilean
- Erroldatu gabeak, 8,25 euro hilean
- Matrikula, 10 euro
Abonu murriztua (langabeak, ikasleak eta gutxitu fisiko eta psikikoak):
- Ohikoa, 4,80 euro hilean
- Erroldatu gabeak, 5,28 euro hilean
- Matrikula, 6 euro
Debagoieneko kirol abonuak
Abonu hauek urtekoak dira.
Familia abonua
- Debagoienekoa, 206,25 euro
- Debagoienekoa (Arrasate plus), 305 euro
Norbanakoaren abonua
- Debagoienekoa, 148 euro
- Debagoienekoa (Arrasate plus), 197,20 euro
Abonu murriztua
- Debagoienekoa, 103 euro
- Debagoienekoa (Arrasate plus), 116,60 euro