Tabber & stringer ekipoak Mondragon Assemblyk Aretxabaletan duen lantegian egingo dituzte. Hori dela eta, datorren ekitaldiko lehen seihilekoan jarduera nabarmen handituko da. Proiektu hori esleitu izanari esker, Aretxabaletan enplegu berriak (12 pertsona inguru) sortuko dira, inguruneko tailer laguntzaileen kasuan jarduera handituko da eta Txinan salmenta ondorengo egitura jarriko dute abian.
Fakturazioak gora
Mondragon Assemblyk 2010eko ekitaldia 22 milioi euro baino gehiagoko fakturazio kontsolidatuarekin (Aretxabaletako lantegiko jarduera, Orangekoa -Frantzia-, Querétarokoa -Mexiko- eta Stockachekoa -Alemania- barneratuta) amaitzea aurreikusi zuen, 160 lagunek osatzen duten langile taldearekin. 2011. urtera begira, aurreikuspenen arabera, 35 milioi euro inguruko negozio zifra lortuko du kooperatibak; aurreko urteko datuekin alderatuta, igoera %40koa izango litzateke.
Beste bi makina
Era berean, eguzki panelen sektoreko beste enpresa garrantzitsu batek duela gutxi eskatu dio Mondragon Assemblyri Txinan dituen produkzio lantegietako baterako mihiztatzeko/soldatzeko beste bi makina (tabber & stringer) fabrikatzeko.
Kooperatibaren arabera bi eskari horiek beste merkatu garrantzitsu batzuetara sartzeko aurkezpen bikaina izango dira: Malaysiara, Brasilera, Indiara, Estatu Batuetara edo Kanadara, esate baterako (herrialde horiek nabarmen ari dira energia berriztagarrien aldeko apustua egiten).
Assemblyk azken urteotan salmenten %3 inguru inbertitu du produktuen eta zerbitzuen gama handitzen. Bilakaera horretan, funtsezkoa izan da Koniker ikerkuntza zentroarekin egindako elkarlana. Koniker ere Mondragon Taldearen baitan dago eta konformazioan eta mihiztaketan espezializatuta dago.