Lau zerrenda horiek ikusgai daude Aretxabaletako Udalaren webgunean. Lehentasuna izango dute lehen zerrendakoek, ondoren bigarrenekoek, gero hirugarrenekoek eta azkenik laugarrenekoek. Hala, baten bat atzera botaz gero zerrendako hurrengoarendako izango da etxea. Hirugarren zozketa izan da hau eta azkena; saltzen ez diren etxeak sustatzailearen esku geratuko dira.
Debagoiendarrei zabalik
Udalak eta Bruesa enpresa eraikitzaileak hirugarren zozketa egiteko hitzarmena berritzea erabaki zuten eta apirilaren 2ko osoko bilkuran onartu. Etxe guztiak saltzeko asmoarekin zozketarako baldintzak aldatu egin zituzten orduan eta eskaintza Debagoienera zabaltzea erabaki zuten. Horregatik lau talde egin dituzte. Hona:
- Lehen taldea: aretxabaletarrak; etxerik ez dutenak; diru sarrerak 22.000-51.000 euro artekoak.
- Bigarren taldea: debagoiendarrak –2008ko abendua baino lehen erroldatuak–; etxerik ez dutenak; diru sarrerak 22.000-51.000 euro artekoak.
- Hirugarren taldea: debagoiendarrak –edonoiz erroldatuak–; etxerik ez dutenak; diru sarrerak 22.000-51.000 euro artekoak.
- Laugarren taldea: debagoiendarrak. Ez dago baldintzarik etxearen jabetzaren gainean, ezta diru sarreren gainean.