Aretxabaletako osoko bilkuran eztabaida sortu zen astelehenean zaharren egoitzarako lurren berkalifikazioa dela eta. Arritxu Oliden alkatearen ustez aurkeztutako proposamena ona eta berritzailea da. Proiektua ekimen pribatuaren esku jarriko da eta kooperatiba moduan lan egingo du zaharren egoitza berriak.
Aralarrek uste du, ordea, eztabaidatu barik eta korrika hartutako neurria dela. Aralarren ustez zaharren egoitza bezalako gai garrantzitsu bat enpresa pribatu baten esku jartzea akats izugarria da. Eraikuntza, kudeaketa eta zaharren egoitzak eskainiko dituen zerbitzuen inguruan udalak ezingo baitu inongo erabakirik hartu.
2009an martxan
Aralar eta Ezker Batuaren kontrako lau botoek, hala ere, ez zuten lurrak berkalifikatzeko erabakia atzera bota. Zazpi izan ziren aldeko botoak.
Arritxu Olidenek azaldu zuenez eraikuntza lanak datorren ekainean hasiko dira eta zaharren egoitza 2009an jarriko da martxan.
Saneamendu ordenantzaren aldaketa
Osoko bilkuran saneamendu ordenantzaren aldaketa ere onetsi zen. Berritze lanak egiten zituzten baserriek fosa septiko bat ipintzeko beharra daukate eta orain arte udalak instalazioaren % 100 finantzatzen zuen. Orain berriz baserriek nekazaritza ustiapena eduki beharko dute finantzazio hau lortzeko. Bestelako baserri eta etxeek fosa septikoa ipintzeko %30eko dirulaguntza bakarrik jasoko dute.