Zaborra %13,9 igoko dute Sasietako mankomunitateak garestitu egin duelako zerbitzua; arrazoia da San Markosekoa itxi egingo dutela. Antzekoa gertatu da urarekin, Ur Kontsortzioak garestitu egin ditu kanona eta beste zerbitzu batzuk, eta ondorioz, %10,6ko igoera jasango dute herritarrek. Gainera, minimotik gora gastatzen dutenek KPIaren igoera ere izango dute.
Automobilen zergak KPI igoko dira. Ondasun higiezinen gaineko zerga, hau da, etxebizitzen gaineko zerga %2 baino gehiago igoko da; batetik, balore katastrala %2 igoko duela Aldundiak aurreikusi duelako Udalak, eta bestetik Arrasaterekin dagoen diferentzia parekatu gura dutelako. Etxeetako lan txikiek KPIaren igoera izango dute, eta energia berriztagarriak sartzeko egindako lanek –eguzki-plakak…– hobaria izango dute.
Kirol etxean ematen dituzten zerbitzuek, batzuk %3 igoko dute eta beste batzuk gutxiago. Udaleku irekiak eta ludoteka KPI igoko dira, eta onartu zuten famili ugarien kasuan hirugarren umeari doan ematea zerbitzua.
KPiaren datua
Udal kontu-hartzaileak azaldu digu KPI edo kontsumoko prezioen indizearen urriko datua hartuko duela kontuan Aretxabaletako Udalak igoerak aplikatzeko. Datu hori azaroaren 12 inguruan argitaratuko dute: "Baina adituek diotenaren arabera %3 edo %3,5 izan daiteke", aurreratu zigun. Eta 2008ko urtarrilean hasiko dira aplikatzen.
Biziguneri emandako etxeek hobaria
Ezker Batua-Berdeak taldeko Tomas Fernandez zinegotziak proposatu zuen etxebizitza Biziguneren eskuetan uzten duen ugazabari etxebizitzaren gaineko zergarik ez kobratzea: "Hala bultzatuko dugu hutsik dauden etxebizitzak errentan ematea", esan zuen. Lau bat etxe daudela Biziguneren eskuetan Aretxabaletan aipatu zuten udalbatzarreko kideek, oso gutxi. Aho batez onartu zuten proposamena.