Hezetasunaren eta igerilekuko urak duen kloroaren erruz zegoen sabaia egoera eskasean. Sabaiko hormigoi armatua herdoiltzen hasita zegoen eta sabai aizuna, hau da, sabai sostengatzailearen azpitik dagoen sabaia eta klimatizazio hodiak oso egoera eskasean zeuden. Hori guztia konpontzeko hormigoiari tratamendu berezia eman diote, eta sabai aizuna eta klimatizazio hodiak kendu egin dituzte. Lanak behar bezala bukatzeko, sabaia margotu dute.
Asier Mujika kirol zerbitzuko teknikariak jakitera eman digu ez dela sabaiarekin arazoak dituzten lehen aldia: "Lehen sabai aizunaren zati batzuk berritu genituen, baina arazoa larriagoa zela konturatu ginenean etorri da gainerako guztia".
Behin betiko proiektua, martxoan
Egunetik egunera arazo gehiago dituzte kirol etxean eta larriagoak, gainera. Zein egoeratan dagoen ikusi ahal izan zuen Iñaki Galdos Kiroletako diputatuak, azaroan. Eta kirol etxe berriaren premia handia dugula jakinarazi zioten zinegotzi zein kirol eta hirigintza teknikariek. Hala, behin betiko proiektua martxo inguruan onartu eta lanak lehenbailehen hasi gura dituzte. 10 milioi euro inguruko aurrekontua izango du.