Astelehenean egindako osoko bilkuran, etxeak eraikitzen ari den Bruesa enpresarekin akordio batera iritsi dela jakinarazi zuen Inaxio Garro alkateak. Metro koadro bakoitzak 2.380,97 euro balioko duela adostu dute.
Osoko bilkurak egoki ikusi zuen prezio hori eta beraz, Bruesa enpresarekin hitzarmena sinatzea onartu zuen. Aralar, EA eta Ezker Batua-Berdeak alderdietako zinegotziek aldeko botoa eman zuten. PSE-EEko Ainhoa eta Angel Sagarribai, berriz, abstenitu egin ziren, prezioaren igoerarekin ez zeudelako ados. EAJko zinegotziak ez ziren osoko bilkuran izan.
Bete beharreko baldintzak
Zozketan sartu ahal izateko hainbat baldintza bete beharko dituzte interesatuek. Besteak beste, 2007ko abenduaren 31 ezkero Aretxabaletan erroldatuta egon beharko dute eta ez dira etxe baten jabe izango. Horrez aparte, 2006an izandako diru sarrerak aurkeztu beharko dituzte. Etxe tasatu horien zozketa uztailean egin nahi du Udalak.
Asteleheneko osoko bilkuran, bestalde, Jaurlaritzarekin babes ofizialeko ehun etxebizitza egiteko hitzarmena sinatzea aho batez onartu zuten. Garrok horien zozketa irailerako edo urrirako aurreikusita dagoela azaldu zuen.