Yerai Varela eta Rosi Talavera garaile Otala zelaiko krosaren 31. ekitaldian

Maila handiko korrikalariek irabazi dute gaur Aretxabaletako Otala Zelaiko krosaren 31. ekitaldia. Guztira 80 korrikalari inguruk hartu dute parte. Gizonezkoetan, Yerai Varela oñatiarrak lortu du garaipena, eta bigarren gelditu den Miguel Angel Efimari minutu bat pasatxoko aldea atera dio. Emakumezkoetan, berriz, Rosi Talavera hernaniarrak lortu du garaipena bigarren urtez jarraian baina ez du hobetu pasa den urteko marka (31:17), bi minutu pasatxo gehiago behar izan ditu. Baina maila onean dagoen korrikalaria dela erakutsi du beste behin Talaverak, 48 urterekin.