Aurreko urteetan legez Gaztela Leon, Extremadura, Galizia, Errioxa eta Euskal Autonomi Erkidegoa ordezkatuko dituzten taldeak elkartuko dira. 10:30ean izango da ongietorria eta gero (11:15) dantza erakustaldiak egingo dituzte herriko hainbat gunetan Galizia etxeko taldeak, Gaztela Leongo San Fernando taldeak eta Aretxabaletako Loramendi Dantza Taldeak. Errioxako Jota taldearen emanaldia, ostera, 12:00etan izango da, plazan.
Eta folkloreari dagokion ekitaldiak egin bitartean erkidego bakoitzeko gastronomia dastatzeko aukera izango dute herritarrek: olagarroa, txitxi-burruntziak, urdaiazpikoa, Errioxako ardoa, albariñoa eta beste asko.
XV. patxaran lehiaketa
Jai giro horretan XV. Patxaran Lehiaketa egingo dute. Lehiaketan parte hartu gura dutenek domekan bertan, 11:00ak eta 14:00ak bitartean, ekarri behar dituzte etxean egindako patxaranak Herriko plazan jarriko duten mahaira. Parte-hartzaile bakoitzari bi botila bakarrik onartuko dizkiote.
Epaimahaiko kideek 17:00etan dastatuko dituzte aurkeztutako patxaranak eta sari banaketa 17:45ean egingo dute. Aranekin egindako patxaranaz gain botilaren orijinaltasuna ere kontuan hartuko dute.
Patxaran onenak egin dituzten lehenengo hirurei garaikurra eta diru-saria emango dizkiete. Eta saria jasotako patxaranak enkantean banatuko dituzte, hau da, diru proposamen onena egiten duenarendako hiru botilak. Gainerako patxaranak herritarrei eskainiko dizkiete proba ditzaten.