Hogei bat metroko garaiera zuen pinuak eta oso dotorea zen. Deba ibaiaren ertzean zegoen landatuta, Urats Gainen lorategian: "Ez dakit zenbat urte izango zituen baina asko bai; 50etik gora zituela esatera ausartuko nintzateke", jakinarazi zuen Joxe Anjel Antxia Ingurumen zinegotziak.
Pinu horren enborra mozten hasita zeudela konturatuta zegoen orain dela egun batzuk: "Baina egun batetik bestera ia erdiraino moztuta agertu zen", dio zinegotziak. Hala, pena handiarekin baina botatzeko agindu zien Makai enpresako lorezainei. Garabi txiki batekin igota moztu zuten motozerrarekin.
Beste zuhaitz handi bat, artea, geratu da lorategi horretan eta Udal arduradunak beldur dira antzeko zerbait ez ote zaion gertatuko.