UDAko zaleak azken jardunaldiko partiduen zain

Zapore gazi gozoarekin itzuli ziren atzo UDAko zaleak Amurriotik. Ia 200 lagun joan ziren Aretxabaletatik, baina animu oihuekin ere ezin izan zituzten hiru puntuak eskuratu. Orain azken jardunaldiko partiduei itxoin behar hirugarren mailan geratuko den edo ohorezko erregionalera jaitsiko den jakiteko. UDAk zapatuan, hilak 8, jokatuko du Ibarra futbol zelaian (18:00).

Aretxabaleta Kirol Elkarteak antolatutako bi autobusak UDAko zalez beteta joan ziren Amurrioko Basarte futbol zelaira. Autoetan ere hurbildu ziren beste hainbat eta giro ezin hobea sortu zuten guztien artean bufanda, kamiseta, turuta eta danborrekin. Basarteko harmailak bete eta etxean legez sentiarazi gura zituzten jokalariak partidua irabazteko, baina ezinean ibili ziren horiek. Bi aldiz ibili zen atzetik UDA eta azkenean pozik itzuli behar berdintzea lortu zuelako (2-2).

Sailkapenean Lagun Onak aurreratzea gura zuten, baina orain domekako partiduei itxoin beharko diote; batetik UDAk derrigorrez irabazi beharra duelako, eta bestetik, Lagun Onakek Zallaren aurka zer egiten duen ikusi beharko delako. Azken postuan dagoen Salvatierra dauka aurkari UDAk Ibarra futbol zelaian, eta zalantza barik zaleak bertan izango dira zapatuan (18:00).

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.