Euskal mitologiako pertsonaia ezagunak izango dira zapatuko ikuskizuneko protagonistak: galtzagorriak. Horiek oso txikiak dira eta nagusiak agintzen dien guztia egiten dute. Arrazoi horregatik, Peru, alfer hutsa bada ere, pozik dago. Baina, halako batean, gauzak ez zaizkio berak uste bezala aterako.
Mahaiko txotxongiloek, argi beltza eta beste hainbat efektu erabiliz, ikusleen irribarreak eta algarak eragingo dituzte. Herri txikietako giroan garatzen da galtzagorrien historia. Euskal Herriko folklorean oinarritutako elementu asko dituen ikuskizuna da.
Urte asko daramatza Enkarni Genuak antzerkian. 1971n Txotxongillo taldea sortu zuen Manolo Gomezekin, haur eta familiei zuzendutako txotxongiloen antzerkian jarduteko asmoz. Orduz geroztik, etenik gabe lan egin du Genuak. Urte hauetan guztietan 22 ikuskizun estreinatu ditu. Horretaz aparte, hamalau ipuin, hainbat liburu didaktiko eta 21 disko argitaratu ditu.