Etxe horietako jabe batek dio irailaren 1ean jakinarazi zietela Bruesa Construcciones enpresa egoera larrian zegoela: "Gu lasaitzen saiatu ziren, obrei irail bukaeran berriro ekingo zietela esanez". Gero urriaren erdian jarraituko zituztela lanok esan zieten, baina oraindik geldi daude eta jabeak oso kezkatuta: "Guk bete dugu gure zatia: etxebizitzaren zenbatekoaren erdia ordainduta dago. Gainera, obren mugimendu falta pazientziarekin bizi izan dugu, baina informazio ezaren aurrean erantzun beharra daukagu. Horregatik, behar-beharrezkoa da jabeok batzea eta zer egin erabakitzea".
Argibide gehiago gura duenak Ene Eguzkiaren Zain izeneko Facebook-eko taldera jo dezake eta honako blogera: http://eneguzkiarenzain.blogspot.com.
Hartzekodunekin adosten
Bestalde, alkateak egunotan egin du berba Bruesako eraikuntza saileko ordezkari batekin eta jakinarazi dio borondate ona dagoela hartzekodunen, Kutxaren eta Bruesaren artean eta laster izango dela konponduta kontua. Uste baino luzeago jo du adostasuna lortzeko tramiteak, baina hartzekodunek sinatu beharreko zirriborroa eginda daukatela esan diote eta sinatutakoan hasiko dituztela lanok, "seguru asko datorren astean".