Herriko koadrilek eta Kultura Sailak elkarlanean Txapel Txin eguna antolatu dute. Ikuskizuna izango dute umeek Arkupen (17:00) Anne Monna taldearen eskutik: Ino, ino, ino, badator Bonbardino.
Torrada lehiaketara aurkeztutako jakiak jasoko dituzte gero (18:00) epaimahaiko kideek proba ditzaten, eta ondoren (18:30), Tusuri taldeak girotuta, suzko kalejira egingo dute herritarrek Durana eta Mitarte kaleetan. Txapel Txin etorriko da kalejira ostean plazara (19:30) eta Aratusteak iragarriko dizkie aretxabaletar guztiei. Torrada lehiaketako sariak ere orduantxe banatuko dituzte: lehenengoarendako, 100 euro; bigarrenarendako, 50 euro; eta hirugarrenarendako, 30 euro. Eta ospakizuna bukatzeko (20:00), txistorra mokadutxoa eta torradak izango dira jateko, sagardoak lagun eginda.
Herri bazkarirako txartelak
Gaur, hilak 5, da azken eguna Aratuste-domekako herri bazkarirako txartelak erosteko –Arkupen, Kultura teknikarien bulegoan (09:00-13:00)–. Iturrigorri pilotalekuan izango da bazkaria eta 450 bat lagunendako tokia dago. Aurten bi menu zehaztu dituzte: 10 urte arteko umeendakoa, 12 eurotan; eta helduendakoa, 19 eurotan.
Pailazoa jausgailuan, kartel irabazlea
Durangoko Mikel Aldekoak egindako kartelak iragarriko ditu aurtengo Aratusteak. 18 lan jaso zituzten Kultura Sailean –erdiak aretxabaletarrek eginak– eta ez dute lan samurra izan epaimahaiko kideek: "Kalitate handikoak eta politak zeudelako". Horregatik, aurkeztutako guztiak ikusgai jartzeko asmoa dute.
Aretxabaletako Aratusteak 2010