Erreka beste aldeko auzoari dagokionez, Inaxio Garro alkateak azaldu zuen azkenaldian erabilitako irizpideak kontuan izan dituztela oraingoan ere; hau da, herriko toponimiaz baliatu direla: "Hori ere herriko altxorra da eta izen horiek ez baditugu babesten, galtzen joango dira. Bere garaian Iralabarri edo Belorrieta izenak berreskuratu ditugun bezala, garrantzitsua izango litzateke ingurune horretan deiturak ere mantentzea".
Garrok aipatu zuen hiru bat izen izan dituztela aukeran; tartean, Basotxo. Izen hori ezaguna da herrian eta horregatik Udal Gobernuak hori arbuiatzea erabaki zuen. Garroren esanetan, "geratzen zirenen artean, Txalapea egokiena iruditu zaigu".
Izena aukeratzeaz gain, EAk proposatuta, urte amaiera baino lehen Giza Eskubideen Adierazpen Unibertsalarekin lotutako kalea izendatzea edo herriko toki batean horrekin lotutako elementua jartzea adostu zuen udalbatzak.
EAko zinegotzi Edorta Mendietak gogorarazi zuen orain dela hilabete batzuk Udalak Giza Eskubideen Adierazpen Unibertsalaren aldeko mozioa onartu zela eta horretan herriko espazio publiko batean adierazpena goraipatzeko ekimena abian jarriko zela.