Aurreko agintaldian onartu zuen Udalak animalien gaineko ordenantza, baina oraindik ez dute jarraipen zorrotzik egiten. Ordenantzak zehazten du zein betebehar dituzten animalien jabeek. Hala, txakurrek identifikatuta egon behar dute, hau da, lepoan mikrotxipa jarrita. Baita udaletxean erroldatuta ere. Horrez gain, kalean eta lorategietan egiten dutenean kaka jasotzeko betebeharra daukate jabeek. Udalak plastikozko poltsatxoak ditu herritarren eskura, eta erabili gura dituztenek harreran eskatu besterik ez dute.
Gainera, arriskutsutzat jotako arrazaren batekoa bada txakurra, Udalaren administrazio baimena behar du jabeak eta arriskutsutzat sailkatua izan dela dioen txartela. Hona arriskutsutzat jotako arrazak: pit bull terrier, staffordshire bull terrier, rottweiler, argentinako dogoa, fila brasileiro, tosa inu, akita inu eta staffordshire terrier amerikarra.
Isunak 21.565 euro artekoak
Orain ere jartzen dituzte isunak udaltzainek, txakurren bat galduta aurkitu badute, esaterako. Hemendik aurrera zorrotzagoak izango dira. Arau-hauste arina eginez gero, –kakak ez jasotzea– 43 eta 431 euro arteko isuna jarriko dute; larria bada, 431 eta 2.156 euro artekoa; eta arau-haustea oso larria bada, 2.156 eta 21.565 euro artekoa.