Orain dela urtebete onartu zuen Udalak hitzarmena sinatzea eraikinaren jabe den Ortubos SL enpresarekin. Helburu bakarra zeukan hitzarmen hark eraikina ez jaustea, eta zaharberritze lanak lehenbailehen hastekotan geratu ziren; iaz bertan. Aurretik, baina, tutuak egiten zituen Tubos de Precision kooperatiba elkarteko langileek alde egin behar zuten eraikinetik, eta kontuak kontu atzeratu egin dira lanak.
Otsailean hasi ziren lehen lantxoak egiten, eta laster egoera txarrean dituen teilatua eta hormak berrituko dizkiote. Egin beharreko guztiak jabearen kontu izango dira sinatutako hitzarmenaren arabera.
Vergara, Jauregui, Resusta y Cia lantegia XX. mende hasieran eraiki zuten. Goitik begiratuta gurutze itxura dauka hasierako eraikinak, nahiz eta gero, gela berriak egiterakoan, hasierako itxura galdu. Eusko Jaurlaritzak arkitektura aldetik interesa duten eraikinen zerrendan sartu zuen. Eta industriari dagokion interesa ere badauka XX. mende hasierako herriko industriaren aztarna delako.
Hala ere, berritu ostean ez dakite zer egingo duten bertan. Aurrerago ekipamenduetarako erabiltzeko asmoa dauka Udalak. Baina oraindik ez du erabaki ze eratako ekipamenduak kokatuko dituen bertan.