Or2tan taldearen estreinaldia izango da taula gainean, baina bi urte pasatxo daramatza musika sortzen. Eta eskarmentu handiko musikariak elkartu dira –hiru Liken taldean jardundakoak–: Txus Gutierrez (gitarra), Iker Iglesias (baxua), Oier Sarasua (gitarra eta haizea), Andoni Arana (gitarra) eta Iban Peñakoba (bateria). Estilo oso ezberdinak nahastu –rock, jazz, folk, funk…– eta kantu instrumental orijinal eta berritzaileak osatu dituzte. Kantu lasaiak erritmo bizikoekin tartekatuko dituztela iragarri dute.
Euskarazko pop rocka
Igor San Juan buru duen taldeak, ostera, hainbat agerraldi egin ditu Debagoienean –Danbakako III. edizioan parte hartu zuen–. Euskarazko pop rock kantuekin entzulea gozaraztea dute helburu. Grupo San Juan taldeko kideak dira: Igor San Juan (gitarra eta ahotsa), Josu Sarasua (bigarren gitarra), Aitor Monedero (baxua), Jokin Vitoria (bateria) eta Mikel Azkarate (saxoa).
