Odoloste Eguna egingo du bihar UDAk, 800 odoloste eskainita

Odoloste Eguna antolatu du Aretxabaleta Kirol Elkarteak biharko. Herriko plazan egingo dute, 18:00 inguruan hasi eta odolosteak bukatu artean. Odolosteekin batera txistorra mokadutxoa eta ardoa eskainiko dituzte. Dirua batzeko asmoarekin antolatu du ospakizuna UDAk.

800 odoloste dituzte gertu bihar egosi eta herritarrei eskaintzeko. Horrekin batera txistorra mokadutxoa ere egongo da eta, eztarrian trabaturik ezer ez geratzeko, ardoa. Prezioari dagokionez, norberak hautatzen duenaren araberakoa izango da.


Herriko hainbat harakinen laguntza izan dute jaia gertatzeko: Juanito Bengoak eta Imanolek odolosteak ekarriko dituzte eta Jon Diazek, txistorra. Ardoari dagokionez Gomez de Segura eta Luis Alegre upategietako Errioxa ardo gorriak eta beltzak izango dira aukeran.
Gainera, kirol elkarteko zuzendaritzako kideen asmoa da txerri-hilketaren gaineko erreportajea ematea plazan bertan, mokadutxoa jan bitartean: "Txerria Herriko plazara ekartzerik ez dugu izan, baina hilketaren gaineko kontuak erakustea gurako genuke: odolosteak eta txorizoak egiten… Izan ere, askok ez dute sekula halakorik ikusi ".

Dirua batzea helburu

Irailean egin zuen lehen jaia UDAk, denboraldi hasierako jaia, eta orduan iragarri zuten beste bi egingo zituztela aurtengo denboraldian: San Martin egunaren inguruan eta ekainean. Jai horien guztien helburua dirua batzea da; horregatik, mokaduarekin eta ardoarekin batera asteroko errifak, UDAk atera duen loteria eta elkartearen armarria duten kopak eskainiko dizkiete herritarrei.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.