Urkulu urtegi gainean dabilen parapentea ageri da Urtzelairen argazkian: "Benetan ikusgarria da, eta hautatzen ibili ginenondako gustukoena izan zen", azaldu digu Murrukixoko presidente den Iñaki San Migelek.
Kurtzebarri tontorretik 300 bat metro behera eginda atera zuen argazkia Urtzelaik, uztaileko arratsalde baten. Parapentean bota zen Jon Iriarte lagunari argazkiak ateratzeko asmoarekin igo zuen, gero GOIENKARIrako erreportajea egiteko.
Bazkideei astean banatu
Dagoeneko kartazaletan sartuta dituzte egutegiak, eta astean bertan hasiko dira bazkideei banatzen. Hala ere, bazkide ez den herritarren batek gura izanez gero Murrukixoko lokalean du eskura, martitzenetan, 19:00etatik 20:00etara.
Bestalde, Murrukixok azaroan egin izan duen Mendi Astea datorren urtera atzeratzea erabaki du. Arrazoia da herrian ez dagoela halako kontuetarako toki egokirik, eta kulturarako egiten dabiltzan eraikina bukatu arte itxarongo du.