Mundumira jaialdiaren hirugarren ekitaldia ospatuko da Aretxabaletan
oraingo asteburuan. Aurreko urteotan bezala, munduko kulturen topaleku
izan nahi du jaialdiak, eta, aldi berean, Debagoieneko natura eta
kultura ondarea ezagutzera ematea da antolatzaileen asmoa. Arrasaten
eta Oñatin ospatutako ekitaldietan jasotako erantzunarekin pozik daude
Mankomunitateko arduradunak, eta Aretxabaletaren txanda da orain.
Mankomunitateko Kultura teknikari German Meabebasterretxearen arabera,
bi izan dira aurtengo ekitaldia Aretxabaletan ospatzeko arrazoiak:
jaialdia antolatzeko herriak azaldutako interesa eta antolakuntzak
jarritako baldintzak betetzea. Jaialdiaren izaera ibiltaria denez,
aretxabaletarrek jaso dute lekukoa aurten. Gaur, egubakoitza, izango da
hasiera ekitaldia, 17:30ean.
Programa zabala
Egitarauari dagokionez, ez da aparteko nobedaderik. Imanol Agirre Euskal Herria
aldizkariko zuzendariak esan bezala, "jaialdiak lau zutabe dauzka:
kalea, kultura, mendia eta elkartasuna". Aurreko bi ekitaldietan
moduan, artisautza azoka, munduko zaporeak, bidezko merkataritza,
mendiko azoka, erakusketak, diaporamak, mendi ibilaldiak, grafitiak,
haurrentzako antzerkia, dantzak eta kaleko antzerki emanaldiak
uztartzen ditu programak. Era berean, bailarako gobernuz kanpoko
erakundeek presentzia nabarmena izango dute aste bukaeran.
Horrekin
lotuta, jaialdiko kamiseta atera dute antolatzaileek. Salmentako
irabazien zati bat lankidetzarako hiru proiektutara bideratuko dute eta
proiektuak Debagoieneko gobernuz kanpoko erakundeen artean aukeratuko
dira.
Musika protagonista
Munduko kulturen festa izanik, musikak protagonismo berezia dauka Mundumiran. Aurten ere proposamen interesgarriak lortu dituzte Euskal Herria aldizkariak eta Gin Tonic produkzio-etxeak. Gaur, egubakoitza, Mariana Ramos (Herriko Plaza, 20:30), egun Cabo Verden dagoen ahotsik hoberenetariko bat eta jarraian dantza egiteko musika mestizoa Gecko Turnerren eskutik; Afrikako eta Brasilgo kutsua nahiz musika elektronikoa nahasten ditu Turnerrek.
Zapatuan, azokako agertokian, Ginea Bissautik datorren Mamadu taldea
(13:00) eta ondoren Balkanetako akordeoiak trikitiarekin nahasten
dituen Euskobalcanic (18:00), Indiaren iparraldeko erritmo
tradizionaletan eta Bollywood pelikulen musiketan oinarritzen den
Jaipur Kawa Brass Band taldea (19:00). Herriko Plazan ere aukera zabala
izango da zapatuan: Echa Paka kubatarrak (12:00), Brasilgo Trio
Forrobodo (13:00), Arabiako dantza tradizionalak eskainiko dituen
Albala (18:30), Tomas San Miguel eta Kuttunak (19:30) eta Palestinako
Dam Palestinako Hip Hop taldea (21:00). Azkenik, Kiko Venenok El hombre
invisible diskoa aurkeztuko du gauerdian. Domekan, Bartzelonako
Orkestra Arabiarra eta Romani Chave bulgariarrak arituko dira eguerdian.
Mendi azoka
Artisautza eta gastronomia azokez gain, mendi azoka ere egingo dute:
ikus-entzunezkoen proiekzioak, argazki erakusketak, ikastaroak, mahai
inguruak, irteerak eta Euskadiko boulder txapelketaren finala ( domekan
Iturrigorri frontoian, 13:00etan). Aretxabaletako hainbat puntutan
aparkalekuak egokituko dituzte. Edozelan ere, jaia txoko guztietara
zabaltzea da asmoa.