Aurten ezin izan du Eibarrekin partidu bakar bat ere jokatu. Iaz, berriz, finkoa izan zen Mandiolaren hamaikakoan, Eibarrek 2.A mailara itzultzea lortu zuenean, alegia. Justu orain dela urtebete, iazko San Juan egunean jokatu zuen azken partidu ofiziala, Eibarrek Rayori Ipuruan irabazi (2-0) eta igoera lortu zuenean. Denboraldi bukaerara justu samar iritsi zen eta uztailaren 5ean egin zioten belauneko ebakuntza, Gasteizen. Lesioak hobera egiten ez zuela eta, berriro operatu zuten martxoaren 14an. Ondoren, hainbat medikurekin kontsulta egin eta futbola uztea erabaki du Etxabek.
Ibilbide luzea futbolean
Mikel Etxabe Loiti 1978ko irailaren 12an jaio zen Aretxabaletan. Bederatzi urte eman zituen Realeko azpiko kategorietan eta harrezkero Real Union, Barakaldo, Xerez eta Eibar taldeetan jokatu du. Defentsan ezker hegalean jokatu izan du. Teknika handiko jokalaria, erasora erraz jotzen zuena, eta ezker hanka bikainaren jabe, azken bi denboraldiak Eibarren eman ditu. Armaginekin ekainaren 30ean bukatuko zaio kontratua.
Egindako lagunak, onena
Etxabek zera diosku: "Urtean zehar buelta asko eman izan dizkiot jarraitzeari, lesioak emandako buruhausteen erruz. Uste baino lehenago utzi behar izan dut futbola baina bizitza aurrera doa. Urte hauetan guztietan egindako lagunekin geratzen naiz. Ez dakit futbolarekin lotuta jarraituko dudan etorkizunean. Aurrerago ikusi behar".