Eraikitzen dabiltzan kirol etxe berriaren proiektuan hainbat proposamen zituen jasota Udalak berdegunerako. Orain herritarrekin adostu gura du zer egin eta lehen saioan elkartutako 30 bat lagunek hainbat ideia bota zituzten: kanpoko igerilekua, aparkalekuak azpian, hainbat kiroletarako kantxak, parke handi bat… Horiek guztiak jaso zituzten parte-hartze prozesuari jarraipena egiten dabiltzan Aztiker gabineteko adituek. Eta zapatuan ideia horien bideragarritasuna aztertuko dute Udaleko hirigintza eta kirol teknikariak lagun dituztela.
Ideia guztiak ondo aztertu ostean adostasuna lortu beharko dute elkartutakoek, baina horretarako hirugarren saio bat egingo dute.
Webgunean iradokizunak
Lehen saioan parte hartzerik izan ez zutenek ere zabalik izango dituzte ateak zapatuan. Eta Udalaren webgunean –www.aretxabaleta.net–, albisteen atalean, lotura bat dago norberaren ideiak, proposamenak eta iradokizunak uzteko. Bertan lehen saioko memoria ere badago zer jaso zuten jakiteko.