Atzo goizean elkartu zen enpresa batzordea Jose Uribesalgo ugazabarekin. Otsailean baieztatu zien Burgosen zabalduko duela lantegia –Joserol SA izeneko talde industrialak–, eta Aretxabaletako langileek eurekin zer gertatuko den jakin gura zuten. "Gezurrak esan dizkigu", adierazi digu ELA sindikatuko metal arloko arduradun Iñaki Arrietak. "Sindikatuetako ordezkariokin ez du elkartu gura izan, nahiz eta otsailean horretan geratu, eta enpresa batzordeari esan dio Burgosko lantegira joateko aukera izango dutela langileek, etxea jarriko dietela han, eta beste kontu batzuk. Guztia gezurra".
Hori ikusita asanblada egin zuen komiteak eguerdian langileekin, eta manifestazioa egiteko erabakia hartu zuten guztien artean.
Ekintza gehiago etorriko dira
Ugazabari mezu zuzena bidalita, Uribesalgo: Lucio Garay ez itxi, lantegiko langile asko atera ziren protesta ekitaldira, 70 inguru. Aretxabaletako kaleetan ibili ostean lantegi aurrean egin zuten elkarretaratzea. "Manifestazioa lehen ekintza besterik ez da izan, herritarrei arazo bat daukagula jakinarazteko. Baina gero eta ekintza gehiago egingo ditugu, eta gogortzen joango gara", gaineratu du Arrietak. Enpresa batzordean hiru sindikatutako ordezkariak daude: LABeko bi, eta ELA eta CCOOeko bana. Bilera egingo dute ekintza egutegia zehazteko.