Orain dela hilabete batzuk herriko lorategiak txukuntzeko erabakia hartu zuen Udalak, tartean, Ilargi plaza pareko iturria lorategi bihurtzea. Kontua atzeratu egin da hainbat ezusteko tarteko, baina azken egunotan gogor egin dute lan Makaiko kideek. Landare eta zuhaixkak jarri dituzte ura egon zen tokian, eta kolore askoko lorategia egin dute. Lorontziaren bueltan lore eta zuhaixkak jarri dituzte eta erdian sagarrondoa. Lorontziaren azpiko aldean, lehen ere berdegunea zegoen lekuan, berriro erein dute belarra.
Lorategia txukun utzi dute, baina lorontzia bera apurtuta dago eta itxura eskasa dauka urte askoan ura izan duelako. Datozen egunotan konpondu eta itxura berria emateko asmoa dauka Udalak.
Faroletatik zintzilik
Loreei dagokionean beste berrikuntza bat ere izan dugu: Durana kaleko faroletan landareak zintzilikatu dituzte. Bi faroletik batean zintzilikatu dituzte lorontziok, eta barruan geranio frantsesak jarri dituzte, gorriak. Hainbat herritarrek adierazi du ez direla ondo ikusten aipatutako loreak oso goian daudelako, baina apur bat hazten direnean beherantz jausiko dira eta lorontzi osoa estaliko dutela uste dute lorezainek. Hori bai, bi egunetik behin ureztatu beharko dituzte.
Aipatutakoez gain ohiko lorategiak ere garbitu eta txukundu dituzte.