Hitzen lapurra bertsotxongilo emanaldiak hasiko du gaur Literatura Astea. 3 eta 8 urte arteko ikasleek ikusiko dituzte bertsoetan oinarritutako txotxongiloen gorabeherak. Ikasle nagusiagoek, ostera, liburuetan topa daitezkeen altxorren bila jardungo dute liburutegian. Lehen Hezkuntzako seigarren mailakoek gertatu diete jokoa.
Datorren astean, astelehenetik eguaztenera bitartean, beste hainbat ekitaldi izango dituzte. Jesus Mari Olaizola Txiliku idazlea izango dute solaskide 6 eta 11 urte arteko ikasleek. Osaba Bin Floren liburuaren idazlea gaztetxoen galderen zain izango da. Ikasle txikienek, ostera, ipuinak entzungo dituzte. Bertako irakasleak eta Irati Pagoaga aretxabaletarrak jardungo dute kontu kontari.
Gainera, ikasleek eurek egindako lanak trukatuko dituzte egun horietan. Eta eguenean, apirilak 2, XVIII. Irakur Maratoia egingo dute.
DBHkoak, apirilaren 22tik 28ra
DBHko ikasleek apirilaren 22tik 28ra egingo dute Literatura Astea. Eta ingelesez gertatutako hainbat ekintza izango dituzte.