Lausitta kaleko saneamendu lanak Erga eraikuntza enpresak egingo ditu eta 223.342 eurotan ezarri du kostua. Galartzara bidean dauden etxeetako bizilagunek aspaldi eskatu zuten saneamendu lanok egitea eta orain inguru guztia txukunduko diete. Ur zikinen eta euri uren hodiak aldatuko dituzte eta gasaren instalakuntza egin; argiteria publikoa ere aldatu egingo dute eta telekomunikazio eta argindar instalakuntzak egokitu lur azpitik. Bukatzeko espaloia aldatu eta etxeei itxitura berria egingo diete guztiek berdina izan dezaten. Lanok egiteko hiru hilabete beharko dituzte.
Bolinagako bideari eusgarria
Bolinagara doan errepidea, ostera, Galdiano eraikuntza enpresak konponduko du 124.838 euro erabilita. Arazoa da bidearen zati bateko lurrek behera egin dutela eta gehiago egin aurretik eusteko moduren bat behar du. Lanok bi hilabetean egingo dituzte eta une batzuetan baliteke itxi egin behar izatea bidea. Halakoetarako, Areantza auzoko Mitarte Garai baserri ondotik dagoen bidea egokituko dute, Bolinagako bizilagunak pasa daitezen.
Lanok hasi aurretik batzarra egin gura dute Udal ordezkariek Lausitta eta Bolinagako bizilagunekin gaizki ulerturik ez egoteko.