Urriko azken astean elkarrizketak egingo dizkiete izena emandakoei eta hautatutako laurak azaroaren 2an hasiko dira lanean. Izena emateko bete behar diren baldintzak honakoak dira: aretxabaletarra izatea; langabezian egotea, horregatik ordainsaririk jaso gabe; edo sarrerak bermatzeko errenta jasotzea.
Martxoan onartu eta abian jarritako Enplegu Planaren barruan daude astean ateratako lau postu horiek. Aurretik, ekainean, beste sei langile hartu zituzten: hiru lagun herri inguruak garbitu eta berritzeko eta beste hiru gune naturalak babestu eta mantentzeko; abendua arte jardungo dute lanean horiek. Eta irail hasieran beste hiru langile hasi ziren lanean, sei hilabeterako: artxibo teknikaria; liburutegiko laguntzailea; eta bide eta bidexken inbentarioa egiteko teknikaria. Gainera, Enplegu Plan hori bideratu eta herriko beharrak identifikatzeko teknikaria dago lanean maiatza ezkero.
Merkataritzaren diagnosia
Bestalde, herriko merkataritza eta turismoaren diagnosia egingo duen ikasle batek jardungo du lanean, Mondragon Unibertsitateko Enpresaritza Fakultateak eta Udalak egindako hitzarmen bati esker. Ikasle hori laugarren mailan dagoen aretxabaletarra da, eta ikasketa bukaerako proiektua izango da herrian egingo duen azterketa lan hori.
Proiektuaren helburua da Aretxabaletako merkataritza eta turismoaren inguruko baliabideen azterketa egitea, herriko errealitatearen diagnosia irudikatzeko. Diagnosi horrek etorkizunean eman beharreko pausoen inguruko pistak emango ditu eta oinarrizko dokumentua izango da ondoren diseinatu beharko den ekintza planaren nondik norakoetarako.
Astean hasi da lanean ikasle hori eta lehenengo lau hilabeteotan egun erdiko lan jarduna izango du; otsailetik aurrera, ostera, egun osoz egingo du lan beste lau hilabetez.