Larrinbeko errekatxoa garbi dagoenean, Udalak azterketa egiteko asmoa du, maiatzaren 25ean gertatutakoa berriro gerta ez dadin. Jakina denez, lur azpitik doan Larrinbeko errekatxoak gainezka egin zuen botatako euri jasen ondorioz eta Ilargi plaza pareko kalea eta Durana kalea erreka bihurtu ziren. "Prebentzio mantenu eraginkorra aurrera ateratzea ahalbideratuko duten neurriak hartzeko balioko du azterketa horrek", adierazi dute Udaletik.
Gaineratu dute salbuespeneko euri jasak gertatuz gero, arriskua dagoela errekatxoak hustubide gaitasunik ez izatea. Metro koadro bakoitzeko 50 litrotik gorakoak dira salbuespeneko euri jasak. "Horrelako euriteak Aretxabaletan askotan ematen dira, baina ez horren epe laburrean", aipatu dute.