Jokaldi bakoitza borrokatuta lortu du UDAk garaipena

Intentsitatea. Berba horrek eman dio Aretxabaletako mutilei domekan Amorebietaren kontra garaipena (2-1). Jokoari dagokionez UDAk oraindik detaile mordoa izango ditu zuzentzeko, baina zelaian izan behar duten jarrerari dagokionez, Gordobilek eta Arenazak pozik egon behar dute derrigor, aretxabaletarrek partidu serioa egin dutelako.

Aretxabaletak irabazi egin du ligako hirugarren jardunaldia, eta dagoeneko zazpigarrena da sailkapenean, hainbat taldekiderekin berdinduta. UDAko mutilek oso partidu txukuna egin dute, eta nahiz eta lehenengo kolpea Amorebietak eman duen, etxekoak partiduari buelta emateko gauza izan dira. Aipatzekoak Gotzon Urtzelai eta Ruben Leonardo, taldeari eusten zelai erdian lan galanta egin dutelako, eta erasoan Imanol Rodriguez izan da protagonista, bi gol eginda.

Kontuan izan Aretxabaletak Realaren zelaian jokatuko duela eguaztenean, hilak 23, 20:00etan.

Ohorezko ligari dagokionez, jardunaldi negargarria gure ordezkariendako. Mondrak etxean galdu Pasajesen kontra (1-3). Eta, etxetik kanpora Aloñak eta Bergarak ere galdu. Aloñak 0-2 Zarautzen –azken unean jaso dituzte bi golak–, eta Bergarak 1-2 galdu du Ordizian.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.