Hamalau urte bete arte herriko eskolan ikasi zuen eta 14 urterekin Durangoko (Bizkaia) San Jose
jesuiten eskolara joan zen. 1936ko altxamendua
gertatu zenean, Belgikara jo zuen, eta gero Kolonbiara. Hemen Filosofia
eta Letretan lizentziatu zen, eta 1945ean Euskal Herrira itzuli zen.
15 urte beranduago erabat murgildu zen euskal kultura eta ikastolen munduan. Bilbon, EDILI erakunde euskaltzaleko zuzendari izan zen.
Durangoko Euskal Liburu eta Diska Azokaren sorreran parte hartu zuen.
Ikastolen bultzatzaile
Aretxabaletako ikastola sortu zuen, Sarasua eta Angel Gabilondorekin batera. Garai horretan, Bizkaiko "Zeruko Argia" aldizkariaren arduraduna izan zen.
Bizkaiko lehenbiziko ikastolen bultzatzaile sutsua izan zen Atxa eta lan bera egin zuen Gipuzkoako zenbait herritan ere.
Gerora Nafarroan, ikastolen munduan sortzaile, bultzatzaile eta irakasle izan zen Jesus Atxa; 1970. urtean Iruñeko San Fermin ikastolako zuzendari izendatu zuten eta bertan egon zen jubilatu arte.
Ohorezko euskaltzain
Euskaltzaindiak 1967ko abuztuaren 25ean euskaltzain urgazle izendatu zuen eta euskaltzain ohorezko, berriz, 1998ko apirilaren 24an.
2003. urtean Manuel Lekuona saria jaso zuen.