Euriaren mehatxuari aurre eginez, kolorez jantzi zen domekan Aretxabaleta. 200 haur dantzari pasatxok ikustaldi polita eskaini zuen guraso, lagun eta senitartekoen aurrean. Urduritasunak alde batera utzita, Leizarra taldekoak irrikaz zeuden plazara noiz irten. "Asko entseatu dugu eta. Oso ondo pasatzen dugu eta gainera lagunak egiten ditugu".
Loramendi Dantza Taldearen erreleboa Leizarra musika eskolak hartu du aurten. Mariatxen Urkia, Leizarra taldeko kideak pozik azaldu da Haur Dantzarien Egunak izandako harrerarekin: "Gogor egin dugu lan ekitaldi hau berreskuratzeko eta aurrera ateratzeko. Gurasoen parte hartzea handia izan da eta benetan, pozik gaude izandako harrerarekin".
Datozen hitzorduak
Jarraian dituzue dantzari gaztetxoak batuko dituzten hitzorduen berri: Soraluzen, ekainaren 6an, Arrasaten, ekainaren 20an, eta Oñatin, irailaren 19an.