Umeek –6 urtetik gorakoak– ipuin kontaketa izango dute bihar (11:30). Kontu Kantoi taldeak Baziren behin… neska abenturazaleak eta mutil abeslariak eskainiko die Udal liburutegian, debalde.
Helduek, ostera, astelehenean (19:30) izango dute antzerkia: Rosas Rojas. La Papa taldeak etxeko biolentziaren eta tratu txarren gaineko antzezlanarekin hausnarketara bultzatuko ditu ikusleak. Arkupen izango da, debalde.
Martxo guztian zine klubean emango dituzten filmeek –eguena, 19:30– emakumea izango dute gai. Hona: gaur, Caramel, hilaren 11n, Leonera; hilaren 18an, En tierra de hombres; eta hilaren 25ean, La teta asustada.
Autodefentsa ikastaroa
Berdintasun Sailak bi ekitaldi berezi antolatu ditu: autodefentsa ikastaroa eta elkarretaratzea. Defentsa pertsonala landuko duten ikastaroa 14 urtetik gorako emakumeendako da eta martxoko zapatuetan izango dira eskolak (11:00-13:00), Arkupen –debalde–. Aurrez izena ematea komeni da Berdintasun Sailera mezua bidalita –berdintasuna@aretxabaleta.net– edo Gizarte Zerbitzuetara deituta –943 71 18 62–.Erasoen aurrean zelan erantzun jakiteko teknikak ikasiko dituzte ikasleek.
Bestalde, elkarretaratzea egingo dute astelehenean (18:00), Herriko plazan. Lehenengoz egingo da gurean eta emakume taldearekin batera antolatu du.