Proiektu berriekin dator Loramendi Elkartea, baina aurreko ibilbideari ateak itxi barik eta helburua eta lan eremua argi dituela: euskara.
Horren guztiaren berri emateko aurkezpen jaialdia egingo du bihar (19:00) eta herriko sortzaileak izango ditu lagun: Karmele Igartua poesia idazlea, Aitor Ziardegi eta Oier Saraua musikariak lagun dituela; Lide Pagaldai eta Lur Gurrutxaga trikitilariak; Aretxabaleta abesbatza; eta Iurgi Etxebarria aktorearen ekitaldia. Gainera, bi lagun afaltzera joateko zozketa egingo dute eta bukatzeko mokadutxoa eskainiko dute.
Loramendi elkarteko presidente Iker Urkiak halaxe eman digu jaialdiaren berri: "Gure ilusioa konpartitzeko jaia antolatu gura izan dugu. Erronkak, proiektuak eta asmoak aurkeztuko ditugu, baina gehiago izango da horiek garatzera eroango gaituzten eta bide horretan lagun izango ditugun sentimenduak eta indarrak bateratzeko jaia".