Zaragozako Mondo Iberica enpresak agindu zien 27 egunetan egingo zituela lanok, eta abuztuaren erdirako bukatuta egongo zirela uste izan zuten UDAko eta Udaleko arduradunek. Eguraldi eskasa tarteko, atzeratu egin ziren lanok, baina dagoeneko erabiltzeko moduan dago, bai entrenamendu saioak egiteko, bai partiduak jokatzeko. Belarrak beste itxura bat dauka orain, eta ureztatze sistema berritzailea jarri diote, kainoi bidez; ate-sareak eta ordezkoen aulkiak ere aldatu dituzte.
UDAko arduradunei oraindik ez dizkiete zehaztu zeintzuk izango diren zelaiak beharko dituen mantentze lanak; hala ere, presidente den Jokin Antxiak ez du uste aparteko lanik beharko duenik: orraztu, ureztatu… betikoak.
Denboraldia hastekotan
Taldeei dagokionean ez dago berrikuntzarik, iazko berberek jokatuko dute denboraldi honetan. Hori bai, futbol eskola jarri dute abian 1997 eta 1999 urte bitartean jaiotako neska-mutikoekin, eta datorren astelehenean, hilak 10, hasiko dituzte entrenamendu saioak. Talde batzuek aste bukaeran hasiko dute denboraldia, baina ez guztiek, hala lagun arteko partiduak ere jokatuko dituzte zapatu eta domekan, Ibarran.
Preferente mailan jokatzen duen taldeak domekan hasiko du denboraldia, eta kanpoan jokatuko du lehen partidua. Donostiara joango da UDAko jokalari izandako Igor Arenazak eta Gaizka Herizek gidatzen duten taldea, Vasconiaren aurka jokatzera. Eta preferenteko taldearen helburua argi dauka UDAko presidenteak: "Lehen lau sailkatuen artean geratzea".
