Hiru txakurrek 48 ardi hil dituzte Aretxabaletan

Zapatutik domekara bitartean gertatu zen erasoa Aretxabaletan. Antza, hiru txakur ardiak zeuden zelaira sartu eta 48 hil zituzten. Ardien jabearekin harremanetan jarri gara baina ez du bere izenik agertzerik gura izan. Hala ere, adierazi digu golpe latza izan dela 48 ardi galtzea. Izan ere, baserritik bizi dira eta eraso honek galera ekonomiko handia ekarriko die.

Ardiak eta bildotsak

"Ardiak bakarrik ez ditugu galdu, baita jaiotzeko zeuden bildotsak ere. Oso golpe latza izan da", adierazi digu artzainak.

Horrelako eraso bat jasaten duten lehenengo aldia izan dela azaldu du; hala, erasoaren aurrean ze neurri hartu aztertzen dabiltzala gaineratu du.

Txakur jabeei deia

Baserritarrak aukera aprobetxatu gura izan du dei bat luzatzeko txakur jabeei. "Animaliekin kontuz ibili behar da. Egunero ikusten ditugu Urkulu inguruan kaletarrak txakurrak paseatzen. Askotan txakurrak aske ibiltzen dira, eta jabeek ez diete kasurik ere egiten. Txakurra dutenak kontziente izan behar dira, eta kasu gehiago egin animaliei", esan du.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.