Herritarrek harrera beroa egin zieten herriko musika taldeei

Arkupe aretoa txiki geratu zen egubakoitz gauean Or2tan eta Grupo San Juan taldeen emanaldian, eta bertako arduradunek ahalegin guztiak egin zituzten inor kanpoan gera ez zedin. Herritarrek harrera beroa egin zieten etxeko taldeei, eta musikariek emanaldi politaz eskertu zuten hori. Txikia da Arkupeko aretoa, baina ze ondo entzuten den bertan.
Bi taldeen kontzertua amaitu zenean, 00:00ak ondo jota, aretxabaletarrak musika gosez geratu ziren, eta Or2tan taldeko musikariek itzuli behar izan zuten taula gainera, euren abesti bat modu akustikoan jotzera. Hain zuzen ere, Sarasua, Txus, Peñakoba, Txurda eta Iglesias boskoteak hasi zuen emanaldia. Emanaldi biribila egin zuten, nahiz eta etxekoen aurrean uste baino urduriago egon zirela aitortu. Abesti propioak eta bertsioak –tartean Joe Satrianiren If i could fly–

jo zituzten, herritarren gozamenerako.

 

Ondoren etorri ziren Igor San Juan eta taldekideak. San Juanek Bergara eta Arrasate aldetik fitxaketa onak egin ditu eta erritmo alaiko abestiak abesti intimoagoekin tartekatu zituzten. Abestiren baten, berriz, zer pentsatua ematen duen galderak bota zituen San Juanek, daukagun guztia izanda ere zoriontsuak ote garen, esaterako. Emanaldiak aurrera egin ahala, Or2taneko Txusen laguntza izan zuten abesti batean, eta azkenekoan Txurda eta Sarasua igo ziren koroak egitera. Esan dugu, agurra egiteko ordua iritsita jendeak ez zuela eserlekuetatik jaikitzeko inongo asmorik.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.