Urtero hartzen dute parte txapelketan eta dagoneko 12. aldiz joan dira igerilari horietako batzuk; oraingoan pozik itzuli dira gainera.
Entrenamendu saioetan egindako lan gogorraren emaitza dira domina horiek eta pozik erakusten dituzte egunotan lau igerilariek: Alex Elortondo, Juan Carlos Barkero, Iker Arejolaleibar eta Iñaki Iturbe. Guztira 11 domina eskuratu zituzten, urrezkoak bost, zilarrezko bat eta brontzezkoak beste bost.
Pedro Balenciaga dute entrenatzailea eta haren begiradapean egiten dituzte igeriketa saioak eguaztenetan, Eskoriatzako kiroldegian. Ondo baino hobeto ezagutzen ditu Balenciagak eta bakoitzak duen guztia eman dezan estutzen ditu oihu artean. Hala, ezin hobeto ibili ziren crawl eta braza modalitatean eta taldeko saioan eta hortxe eskuratu dituzte domina guztiak. Entrenatzen jarraitzeko indarra jaso dute lau igerilariek domina horiekin.