Gazteria teknikari Maider Etxanizek astero berritzen ditu. Informazioa eta bereziki administrazio arlotik datozen lan eskaintzak eta beka deialdiak jaso eta paneletan jartzeaz arduratzen da.
Etxanizen esanetan, deialdi guzti horien artean egunotan badago gazteendako oso interesgarria izan daitekeen deialdi bat: Euskadiko Gazteak Lankidetzan programa. Horren helburua Euskadiko gazteen artean elkartasunaren balorea sendotzea eta garapenerako ekintzen inguruko sentsibilizazioa sortzea da. Ekintza horiek hegoaldeko herrialdeetan izaten dira uztailetik urrira bitartean, Amerikan, Asian eta Afrikan.
Programa horretan izena emateko epea apirilaren 7a arte dago zabalik. Horren gainean argibide gehiago edo izena eman gura duena, honako helbide elektronikoa sar daiteke: www.gazteaukera.euskadi.net.
Egitasmo horretaz gain, gazteek beste hainbat deialdi topa ditzakete, hala nola, Donostiako Hezkide Eskolak boluntarioen lanaren gaineko oinarrizko ikastaroa antolatu duela, Arrasateko Emakume Txokoan dinamizatzaileak behar dituztela eta Txatxilipurdi aurtengo udalekuetan lan egiteko begiraleak eta sukaldariak bilatzen ari dela.
Txostena liburutegian
Herriko bi panel horietan agertzen den informazioaz gain, beste deialdi eta lan eskaintza batzuk jasotzen dituen txostena liburutegian uzten du gazteria teknikariak. Lan eskaintzei dagokion txostena astero berritzen du eta dirulaguntza eta lehiaketa deialdiei dagokiona, berriz, hilabetean behin.