Dena dela, gaur egun argitasuna dena, garai batean iluntasun hotza zen. Izan ere, erresuma beltzean ez zegoen argirik, hitzik, hizkuntzarik... Orduan Argitxo heldu zen eta Dir-dir pertsonaiaren laguntzaz iluntasun horretan lehenengo argia piztu zuen. Hori ikusita, gainontzeko argiek ere gauza bera egin zuten, izarrez eta argitxoz betetako unibertsoa sortu arte: hizkuntzen unibertsoa. Argi horietako bat izango da euskararen izarra eta aurrerantzean bere zaindaria izango da Dir-dir.
Hizkuntzen unibertsoan euskararen argia bizirik mantendu nahi badugu euskaraz hitz egin behar dugula erakutsi digute Kukubiltxo taldekoek azken txotxongilo emanaldi honen bitartez.
Kukubiltxo taldeak Argitxo eta Dir-dir emanaldiarekin berriro ere erakutsi du txotxongiloen munduan daukaten maisutasuna. Teknika aldetik, gainera, txotxongiloen munduko teknika berriak aplikatu dituzte; argi-itzalekin eta argiztapen sistema bereziak erabilita efektu ikusgarriak lortu dituzte pertsonaietan. Dir-dir -ek, esaterako, ez du txotxongilo gorputzik; argi hutseko pertsonaia da.