Ekainaren 5ean Ingurumenaren Nazioarteko Eguna dela gogoan hartuta antolatu dute Aste Berdea. Hiru berbaldi eta film emanaldi bat egingo dituzte, eta lehen berbaldia bihar da.
Euskal Herriko paisaiak izan duen garapenaren gainean egingo dute berba Jakoba Errekondo eta Asier Galdos paisajistek. Galdos da hain zuzen, Urkulu urtegi inguruaren gaineko plana egin duena.
Paisaia bakoitza lurralde horretako ingurumenak jasandako gizakiaren eraginen ondorio zuzena dela azalduko dute, eta euskaldunon kultura osatzen dabilen eran gure paisaia aldatzen dabilela argitu. Beste kulturetatik egokitutako nekazaritza, abeltzaintza, eraikuntza eta teknologiak gure paisaian dirautela diote eta gure kulturan: "Eta bai kulturak, bai paisaiak erresistentziarako eta iraupenerako joera dute, baita geureek ere".