Ezohiko eta premiazko osoko bilkura egin zuen udalbatzak joan zen eguenean, hilak 2, lehenbailehen onartu beharreko hainbat gai atzeratu egin zituztelako martxoaren 30ean egindako bilkuran. Mitarte kaleko saneamendu eta berritze lanak zeinek egin hautaketa atzeratu egin zuten bi enpresak puntu berdintsuak zituztelako. Gaia Hirigintza Batzordean aztertu ostean Amaral enpresa eraikitzaileari ematea erabaki zuten eta aho batez onartu. Otalora kaleko berritze lanak ere Amaralek egin zituen.
Bestalde, zaborraren tasa %20 igotzea onartu zuten mankomunitateak proposatutako moduan.
Etxe tasatuak hutsik
Deba ibaiaren beste aldean Bruesa enpresa eraikitzailea egiten dabilen etxebizitza tasatu batzuk hutsik daude eta zozketa egiteko hitzarmena onartu zuten osoko bilkuran. Talde ezberdinak egingo dituzte zozketatzeko: lehenengoan sartuko dira aretxabaletarrak, diru sarreren baremoan sartzen direnak eta etxerik ez dutenak; bigarrenean, Debagoienekoak; hirugarrenean, diru sarrera maximoak gainditzen dituzten Debagoienekoak; eta laugarrenean interesa duten guztiak, baita etxe baten jabe direnak ere. Hala ere etxeren bat hutsik geratuz gero Bruesak nahi bezala saltzeko aukera izango du, beti ere prezioa errespetatuta. Ezker Batua-Berdeakeko zinegotziak esan zuen babestutako etxeen filosofiaren aurka zihoala "libreak izango direlako azkenengo taldeetako etxe horiek" eta ezezkoa eman zion.