ETAren aurkako mezu argia
"Pankarta horren eskaera aspaldi geneukan eginda, lehenengo berbaz eta gero idatziz; izan ere, uste dugu terrorismoari zilegitasuna kendu behar diogula", azaldu digu PSE-EEko Ainhoa Sagarribaik. Garrantzitsua dela balkoian egotea dio: "Indarkeria egon badago horren adibide dira: pankartak, pintadak, jasan ditugu erasoak eta isekak… Horiei erantzun egin behar diegu, eta pankarta aurrerapausoa da". Era berean, eskerrak eman gura izan dizkie herritarrei martxoaren 9ko hauteskundeetan emandako erantzunagatik.
EAren iritziz mezu orokorrak ez dira nahikoa, "egoera konkretu baten aurrean ez diotelako herriari mezu garbirik luzatzen". Eta gaineratu du: "ETAren indarkeriazko estrategiaren aurrean ezin da postura epelik hartu, ez kalean eta are gutxiago erakundeetan. Gizarte honek hainbat aldiz ETAri luzatu dion ezetz borobila Udalak ere behingoz berea egitea gure erantzukizuna dela uste dugu".
EAJko zinegotziak ere pankarta jartzearen alde agertu dira: "ETAren aurkako mezu argi eta garbia da. Gaitz handia egiten du ETAk, herritarrak mehatxatuta egotea, esaterako. Bisualizatu egin behar dugu ETAren aurka egotea, presoen dispertsioaren aurka egotea bisualizatuta daukagun moduan", dio Arritxu Olidenek.
Beste lelo baten aldekoak
Aralarrek, ostera, gurago du beste lelo bat: "Giza eskubide guztien alde proposatu nuen nik", dio Inaxio Garrok, "injustizia sozial eta politiko guztiak bilduko lituzkeelako horrek".
Antzekoa aipatu du Ezker Batua-Berdeakeko zinegotzi Tomas Fernandezek: "ETA arazo bat da, eta ni aurka nago, baina beste terrorismo batzuk ere badaude: genero-indarkeria, islamdarrek sortutakoa, eskuin muturrekoena… ETAren aurka egonda ere gurago nuen nik terrorismo osoa aipatuko lukeen leloa erabiltzea: Terrorismoaren aurka eta giza eskubideen alde, edo antzeko bat".