Inaxio Garro alkatearen esanetan bi arrazoi izan ditu Udalak erabaki hori hartzeko: "Bata, herriko erdi gunetik astean zehar pasatzen diren 305 autobus saihestea, hortaz, horrek dakartzan kutsadura, zarata… eta batez ere arriskuak ekiditea". Eta bestea, Eibar-Gasteiz autobidetik joaten diren autobusak Aretxabaletan geldialdia egitea, orain egiten ez dutena: "Linea horrek herrian geldialdia egiteko ezinbesteko baldintza jarri zuen Pesa autobus konpainiak geltokia herriko gunetik kanpo jartzea, bestela denbora asko galduko litzatekeela zioen”. Hortaz astelehenetik aurrera bai Arrasate aldera, bai Gasteiz aldera joateko Azbe lantegi parera jo beharko dute herritarrek.
Lurraldebus txartela eskura
Bestalde, Udalak jakinarazi du datorren astetik aurrera herrian bertan eskuratu ahal izango dela Lurraldebus txartela: Zainduz gimnasioan eta Arkupe kultura etxean. Eskaera egin eta txartela bideratzeko ordutegia zehaztu dute: aste egunetan, 10:00etatik 13:00etara eta 16:30etik 19:00etara, eta zapatuetan, 10:00etatik 13:00etara. Ordainketari dagokionez, Zainduzen txartel bidez ordaindu ahal izango da; Arkupen, ostera, dirua eskura eman beharko da. Gainera, txartela eskuratu bakarrik ez, gero kargatzeko aukera ere egongo da.
Bi urte pasatu dira Lurraldebusen txartel bakarra abian jarri zutenetik eta hasieran herrian bertan eskuratzeko modua egon bazen ere azken hilabeteotan Arrasatera joan beharra zeukaten aretxabaletarrek. Txartel bakarra erabilita %40ko deskontua egiten dute autobuseko txartelaren prezioan, eta deskontu hori %90 artekoa izan daiteke hilabetean pilatutako bidaia kopuruaren arabera. Gainera, familia ugariko kideek, deskontu osagarriak dituzte.
Txartela eskuratzeko esku-orria bete behar da eta bertan eskatutako agiri guztiak aurkeztu. Astebete inguru behar dute gero txartela bidaltzeko.