20 c alderdiaren, hau da, Copreciko aparkalekuaren Hiri Antolaketa Arauen elementuen aldaketa puntuala onartuko du Udalak hil honetan. Copreci lantegiko arduradunen asmoa da aparkalekua dagoen tokian eraikin berri bat egitea eta jarduera aldaketa hori da Udalak onartuko duena urtarrilaren 25ean egingo duen osoko bilkuran. Aurretik, baina, herritarren parte-hartze prozesua zabaltzera derrigortuta dago, Lurzoruaren legeak hala dioelako.
Hori horrela, bi saio egingo ditu herritarrekin eta elkarteetako kideekin datorren astean: martitzenean, hilak 12, Arkupe kultura etxean eta eguenean, hilak 14, udaletxeko ganbaran (18:30-20:30).
Lantegia txiki geratuta
Hiri Antolaketari dagokion aldaketa puntual horri azaroaren 30eko osoko bilkuran eman zion hasierako onarpena udalbatzak. Lantegi alboan dagoen aparkalekua kendu eta eraikin berri bat egiteko arrazoia da txiki geratu dela Copreci. Hala, orain dagoenaren osagarri izango da eraikin berria eta Udalarekin hitzartu du ahal den eraginik txikiena izango duela herritarrengan.
Datorren astean egingo dituzten bi parte-hartze saioetan herritarren iritzia jasoko du Udalak. Batetik, Hirigintzako Plan Orokorra egiten jardun duen batzordeko kideak izango dira eta bestetik, interesa duten herritar guztiak: "Badakigu inguru horretako bizilagunek zeresanen bat edo kezkaren bat izan dezaketela", jakinarazi du alkateak.
Parte-hartze prozesu horretan jasotako iritziak, baina, ez dira izango erabakitzaileak.