Copreciren arazoa ez da apartekoa herrian; izan ere, Aretxabaletan ez dago lursail asko industriarako egokiak, eta, pixkana-pixkana, industria erdigunean, etxeen inguruan, geratu da. Aretxabaletako Udalak horren gaineko gogoeta egin du, eta baditu asmo batzuk: "Ze esparru industrial dagoen ikusiko dugu, eta industria birmoldatu egingo dugu: gaur egungo lekutik atera eta leku egokiago batera eramango dugu. Erdigunean, bestelako enpresa batzuk ipini gura ditugu: diseinu, teknologia eta zerbitzu arloetakoak, alegia", dio Udal Industria zinegotzi Edorta Mendietak. Plan hori oraingo agintaldian hasi da lantzen Udala, eta, zinegotziaren esanetan, "epe ertain edo luzerako proiektua da; anbizio handiko proiektua da, eta oso konplexua".
Udalaren esanetan, urrian bultzatu zen Herritarren Parte-Hartze prozesuan, industriaren kokagunearen gaineko kezka behin eta berriz azaltzen zen.
Hiru urteko epea
Copreciri dagokionez, eurek aurkeztu diote proposamen landu bat Udalari, eta leku aldaketa 2009-2012ko Plan Estrategikoko helburuetako bat da. Copreciko kudeatzaile Javier Oleagaren esanetan, "hiru bat urtean, proiektua landu egin behar da". "Gure lehentasuna Aretxabaletan geratzea da, bazkide guztiak hemengoak direlako, baina, ezin izango balitz, beste aukera batzuk begiratuko genituzke, betiere, ibarrean". Leku aldaketak Copreciko 900 langileei eragingo lieke.
Copreciren proposamena herriko sarrerako lurretara joatea bada ere, "Udalaren proposamenetara zabalik" dagoela dio.