Arrasatek eta Aretxabaletak bat egiten duten gunean biribilgunea egingo dute. Biribilgune handia izango da, Bergarako Elorregi auzoan dagoena baino handiagoa, eta, eraikitze lanak hasi aurretik, orain dauden sistemak aldatu egin behar dituzte lekuz: ur zikinak jasotzen dituen kolektorea eta goi tentsioko argindar linea. Horretantxe dabiltza ibaiko hondeatze-makinak.
Hiru errepideren elkargunea
Egingo duten biribilguneak Garagartzatik datorren errepidea –Olandixoko tuneletik bueltan–, GI-627 errepidea eta Aretxabaleta herrira doan bidea hartuko ditu. Hain zuzen, bi herrien mugan geratuko da. Guztira, 80 metroko diametroa izango du eta automobil asko hartuko dituela aurreikusten dute, Gasteiz, Donostia eta Bilbo aldera irteteko aukera eskainiko duelako.
Lanon proiektuak hainbat aldaketa izan ditu azken hilabeteotan eta oraintsu elkartu dira Arrasateko eta Aretxabaletako udal ordezkariak Aldundikoekin. Azken aldaketak jasotzen dabiltza orain, eta laster, behin betikoa argitaratuko dute. Lanok 2010eko ekainean bukatzea aurreikusten dute arduradunek.